CONTRADISCURSO [★] Xabier P. Igrexas
Trincheira dixital de XABIER P. IGREXAS
8.000 postos de traballo destruídos. 200 empresas desapareceron. Un dos tres estaleiros xa pechou e outro fica sen actividade. Eis o resultado do continuado abandono do sector naval por parte dos gobernos español e galego. Esta situación ameaza un sector que representa o 30% da riqueza da comarca e que chegou a atinxir 30.000 empregos, … Seguir lendo Defendamos o naval
A grave situación do sector naval en Galicia estivo moi presente na celebración do Primeiro de Maio en Vigo. Celebración masiva, na que o sindicalismo nacionalista tivo a maior manifestación da súa historia nesa data.
A demanda de solucións urxentes que impidan o esmorecemento definitivo da construción naval na ría de Vigo foi das máis proclamadas. As e os moitos que antonte se mobilizaron saben da estreita relación, causa-efecto, entre a situación do tecido produtivo e a taxa de desemprego.
Solventar a problemática arredor do tax lease non resolverá completamente a grave situación do sector naval, mais a súa non resolución poderá supor amunición que resta para rematalo. A automoción non atravesa tampouco o seu mellor momento. Ficamos perante unha grave crise que afecta ás potencialidades produtivas da nosa comarca a nivel industrial. A agonía … Seguir lendo Agonía industrial.
O vixente modelo de construción europea fica supeditado directamente aos intereses da oligarquía empresarial e financeira, nomeadamente do centro continental. A UE é hoxe a Europa do Capital, fronte á necesaria cohesión social; a Europa dos Estados, fronte á Europa dos Pobos. Ao cabo un modelo europeo que desde a súa propia xénese fundacional agromou de costas aos intereses da maioría social, e de costas á súa periferia, da que Galiza é parte.
Para as galegas e os galegos a UE supuxo a teimosa mutilación das nosas capacidades produtivas. Hoxe esa tendencia de condenar o noso país a ser periferia consumidora constátase na deliberada agresión contra a construción naval nas nosas rías, e volverá constatarse coa reforma da política pesqueira común que ameaza, máis unha vez, con reducir á mínima expresión un sector tamén estratéxico para a nosa economía.
A suspensión de pagos de Barreras pon en evidencia a dramática situación que atravesa un sector produtivo fundamental non só para Vigo e a súa contorna, senón mesmo para o conxunto do noso país. A construción naval, outrora un dos motores económicos da exigua industria galega, corre o risco real de afundir de xeito definitivo, condenando ao desemprego ás máis de 18.000 traballadoras e traballadores que emprega directa e indirectamente.
O último golpe veu da man da arbitraria e inxusta decisión da UE de suspender o mecanismo de contratación Tax Lease, malia consentir que sistemas semellantes se sigan a aplicar noutras latitudes da propia Unión. Máis unha evidencia de que no deseño da Europa do Capital o noso país fica condenado a ser periferia dependente, consumidora e non produtora.
Mañá cumprirase un mes dende que a asemblea de parados do naval vigués decidira acampar fronte á sede da Xunta de Galiza en Vigo, esixindo o cumprimento das garantías da bolsa de contratación que recentemente a patronal, coa complicidade de CCOO e UGT, acaba de eliminar vulnerando o Convenio Colectivo. Estes 30 días de campamento producíronse despois de semanas nas que os traballadores protagonizaran un importante proceso mobilizador, co que pretendían visibilizar a súa problemática, que non é outra que a da substitución de man de obra por outra foránea e máis barata para o empresario.
Esta acción reivindicativa evidencia a gravidade da situación que atravesa un sector fulcral para a economía produtiva da nosa nación, e principalmente da bisbarra viguesa, e serve para implicar o conxunto da sociedade nunha problemática que non é isolada e que ameaza a outros sectores e empresas, coma se está a vivir tamén, por exemplo, na construción.
